Aproximación grafemática á representación dos contextos de nasalidade vocálica no galego medieval

Abstract

A investigación na historia da lingua ten prestado unha atención continuada, desde diferentes perspectivas, ao fenómeno da nasalidade vocálica medieval, mesmo en tempos recentes a partir da edición de fontes documentais. Con este contributo pretendemos realizar unha aproximación desde un punto de vista grafemático. Para isto exploramos a representación dos contextos de nasalidade vocálica a partir de dúas series de pergamiños: unha delas, constituída polas públicas formas que hoxe conservamos do notario Johán Ares, analiza a situación no último cuarto do século XIII; a segunda, pola súa banda, toma en consideración un conxunto de documentos relacionados co notario Gonzalo Pérez do Mato e a disputa polos dereitos señoriais do couto de Mende, situado as inmediacións do Ourense medieval.